Recommended films by
" Dr. Noha Mostafa"
The Shawshank redemption - 1994
مسجون ظلم، بتتهان، بتجبر تخالف القانون في السجن و انت أصلا مخالفتوش بره، كل مفاهيمك السابقة بتتغير و تتبدل و تبدأ تفهم حقيقة النفس البشرية اللي ممكن تلاقي نفوس نضيفة جوه ناس ظاهريا مجرمة و العكس تلاقي شر و ظلم و استبداد من اللي المفروض إنهم شرفاء...
المقاومة الجسدية مش حل لأنهم أقوى منك... لكن روحك و عقلك أقوى منهم... بالفن و الثقافة و التعليم هتقدر تقاوم و في الآخر هتنتصر و لو بعد سنين.....
"That's the beauty of music, they can't get that from you"
Legends of the fall - 1994
الماضي جميل، كان مليان فرحة و حب و لمة عيلة... الزمن بيمشي و في ناس بتمشي معاه... ممكن تدي ضهرك لكل حاجة و تهرب بعيد و تتخلى عن كل اللي حبوك، لكن مش هو ده الحل...
متتخلاش عن اللي بيحبوك و متبقاش أناني.... و في نفس الوقت اقبل اللي بتحبهم بشخصيتهم و بجنونهم و متحرمش نفسك من الحياة اللي بتجلم بيها...
"Some people hear their own inner voices, and they live by what they hear, such people become crazy or legends!!"
The Truman show - 1998
يا ترى انت عايش ليه؟!! ايه سبب وجودك و ايه هي حدودك؟!!! تفضل في المضمون ولا تغامر في المجهول؟!!! ازاي هتحافظ على سلامك الذاتي لو عرفت إن كل اللي حواليك مسرحية!!!
ترومان جوه كل واحد فينا، لكن ترومان بس هو اللي قدر يخرج بره العرض المكتوب مسبقا علشان يعمل عرضه الخاص اللي محدش هيشوفه ولا يعيشه غيره هو بس...
"We accept the reality of the world with which we are presented"
Cast away - 2000
حياة مثالية.. حبيبة و أصدقاء و شغل و فلوس... فجأة انت لوحدك.. فقدت كل شئ... فقدت حتى أبسط الاحتياجات الانسانية الأساسية.... هتعمل ايه!!! الحل الأسهل هو إنك تستسلم لليأس... تستنى الموت البطئ أو تربط حبل و عقدة و تقتل نفسك... لكن ربنا مش عايزك تموت و إلا كان موتك من البداية.... ربنا عايزك تقف على رجليك و تعمل كل اللي مكنتش تتخيل إنك تقدر تعمله... علشان لما يكتبلك ترجع تاني تعرف إن مفيش حاجة سهلة و إن كل لحظة في حياتك نعمة تستحق الشكر... ثق في العلامات و استناها...
"Who knows what the tide could bring?"
Music of the heart - 1999
زوجها هجرها بدون جرم منها، وحيدة مع طفلين بدون مصدر دخل ولا مؤهل دراسي، كل اللي تملكه فيولين و موهبة كبيرة... ازاي هتقدر تنجح و تواجه مجتمع مش مقتنع أصلا بيها ولا بفنها!!!
الفيلم ده بالنسبالي حالة انسانية و فنية لا توصف و طبعا مصدر إلهام كبير...
"I want you all to play from your hearts"
Finding Nemo - 2003
سمكة وحيدة في وسط المحيط و محتاج تقطع المحيط كله علشان تدور على اللي ضاع منك... حاجة مستحيلة و مخاطر ملهاش حدود، لكن تخيل إنك هتقدر ف الآخر!!! اللي هيساعدك بعد إرادة ربنا، يقينك و إرادتك و صحاب كتير هتقابلهم في الرحلة هيكونوا هم كنزك الحقيقي و كل واحد فيهم هيساعدك حتى لو في البداية انت كنت رافض المساعدة دي...
محدش يقدر يمنع حد من قدره و خوفك المرضي على حبايبك مش هو اللي هيحميهم...
"When something is too hard, theres always another way"
Little Miss Sunshine - 2006
كل عيلة فيها مشاكل، ممكن عيلة فيها واحد فاشل، أو واحد مدمن، في عيلة فيها واحد محبط و عايز ينتحر أو واحد رافض كل حاجة، في عيلة فيها حد منهك طول الوقت و حاسس ان محدش مقدره أو حد بيحلم حلم مستحيل.... لكن في الفيلم ده العيلة دي فيها كل النماذج دي و فيها ناس كل واحد ماشي في طريق و مش شايف انه ممكن يتلاقى مع الباقيين في أي نقطة مشتركة!!!! لكن في لحظة كلهم أحلامهم بتتحطم و بيلاقوا إن الحل الوحيد هو إنهم يمسكوا في بعض و طريقهم يكون واحد مهما كان طريق متعب بعربية بتعطل أكتر ما بتمشي!!!
امسك في اللي بيحبوك و متسيبهومش... متنساش الدرس ده...
"No one gets left behind"
La La land - 2016
أحدث فيلم دخل القائمة.... لا لا لاند حلم رومانسي جميل و ملون لكن مش واقعي بالنسبة لناس كتير... لا لا لاند هي أرض الأحلام.... مهما طرت بين النجوم لازم في لحظات تنزل على الأرض و وقتها هتخاف إن مش كل اللي حلمت بيه هتقدر تحققه زي ما اتخيلته... حتى لو الحياة أصرت إنك تتخلى عن حاجة كنت بتحلم بيها، متقفش و متخليش ده يكسرك... كمل حياتك و سيب حلمك ده عايش جواك حياة تانية تقدر تعيشها زي الفراشة.... حب لآخر حتة ف قلبك لكن متخليش ده حاجز بينك و بين الواقع اللي انت عايشه...
"She told me a bit of madness is key... to give us new colors to see"
Forrest Gump - 1994
كل اللي كان متوقع منك هو انك تعيش في مدينتك الصغيرة... طفل يتيم فقير معاق... مين كان ممكن يتخيل إنك تكون أسطورة يا فورست... تجري و تحارب و تشتغل و تنجح و تلهم الملايين من غير حتى ما تكون انت حاسس بقيمة اللي انت بتعمله...
اللي بيحركك قدر انت مش متحكم فيه، و روح طيبة و متسامحة ربنا وهبها ليك... فطرتك و قدرك هم مع بعض اللي خلوك علامة في حياة أي حد شاف حكايتك...
"Miracles happen everyday. some people don't think so, but they do"
The pursuit of happyness - 2006
حاسس إنك متستحقش اللي بيحصلك ده!! الحظ معاندك و الحياة كل يوم تزود عليك ضغط و معاناة أكتر من اليوم اللي قبله!!! معندكش رفاهية الاختيار ولا الاستسلام، لازم تواصل و لازم تكتم جواك إحباطك و وجعك، لازم تكمل علشان الناس اللي حياتها متعلقة بيك، لازم تروح شغلك مركز و منور مهما كان اللي مستنيك بره.... بتضيق أوي عليك أووووووووي... و فجأة ربنا يكافئك و تعرف إن كل اللي فات كان علشان يوصلك للحظة دي بالإحساس ده.....
الفيلم ده مهما اتكلمت عنه مش هقدر أعبر عن حبي و احترامي له و قد ايه أثر فيا و لما كانت بتضلم أوي كان دايما (كريس جاردنر) بينورلي في الضلمة و يقولي معلش، استحملي شوية كمان....
"No sir, it wasn't easy"
